Səyahət yalnız yeni ölkələr görmək deyil, gündəlik həyatın tempindən uzaqlaşmaq, fərqli mədəniyyətləri tanımaq və yeni təəssüratlar qazanmaq üçün də yaxşı fürsətdir. Bunun üçün isə hər zaman uzunmüddətli viza prosedurlarından keçmək lazım deyil.
Azərbaycan vətəndaşlarının ümumvətəndaş pasportu ilə vizasız səfər edə bildiyi kifayət qədər ölkə var. Bu istiqamətlər arasında həm yaxın qonşu ölkələr, həm də daha uzaq və ekzotik məkanlar yer alır.
Bəs vizasız gedə biləcəyimiz ölkələrdə haraları görmək olar?
Türkiyə – İstanbuldan Kapadokiyaya
Türkiyə Azərbaycanlıların ən çox üz tutduğu istiqamətlərdən biridir. İstanbulda Ayasofya, Sultanahmet meydanı, Topqapı sarayı və Bosfor boğazı, Kapadokiyada isə qayalıqlar və isti hava şarları ilə məşhur mənzərələr turistlərin əsas seçimlərindəndir.
Azərbaycan vətəndaşları Türkiyədə 90 günədək vizasız qala bilərlər.
Gürcüstan – Tbilisi, Batumi və Kazbek
Gürcüstanda səyahət üçün yalnız Tbilisi ilə kifayətlənmək lazım deyil. Tbilisinin köhnə şəhəri, Narikala qalası, Batuminin sahili və Kazbek istiqamətindəki dağ mənzərələri fərqli səyahət imkanları yaradır.
Azərbaycan vətəndaşları Gürcüstanda 90 günədək vizasız qala bilirlər.
Çin – Pekindən Şanxaya
Çin son illərdə Azərbaycanlı turistlər üçün daha əlçatan istiqamətlərdən birinə çevrilib.
Pekində Böyük Çin səddi, Qadağan olunmuş şəhər və Səma məbədi, Şanxayda isə müasir şəhər mənzərəsi və Bund sahili turistlərin diqqət çəkən məkanlarıdır.
Azərbaycan vətəndaşları Çində hər giriş zamanı 30 günədək, 180 günlük müddət ərzində isə ümumilikdə 90 günədək vizasız qala bilərlər.
BƏƏ – Dubay və Əbu-Dabi
Daha çox şəhər və müasir memarlıqla maraqlananlar üçün Birləşmiş Ərəb Əmirlikləri alternativlərdəndir.
Dubayda Burc Xəlifə, Dubai Marina və Palm Jumeirah, Əbu-Dabidə isə Şeyx Zayed məscidi və Luvr Abu Dhabi ziyarət edilə bilər.
Azərbaycan vətəndaşları BƏƏ-də 90 günədək vizasız qala bilirlər.
Serbiya – Belqrad və Novi Sad
Avropaya vizasız səyahət etmək istəyənlər üçün Serbiya variantlardan biridir.
Belqradda Kalemeqdan qalası, Dunay və Sava çaylarının qovuşduğu ərazi, Knez Mihailova küçəsi, Novi Sad şəhərində isə Petrovaradin qalası turistlərin getdiyi məkanlardandır.
Serbiyada 90 günədək vizasız qalmaq mümkündür.
Albaniya – Tirana və Saranda
Dəniz və yay istirahətini sevənlər üçün Albaniya maraqlı seçimdir.
Tirana ilə yanaşı, Adriatik və İon dənizi sahillərində yerləşən Saranda, Ksamil və Berat şəhəri turistlərin diqqət çəkdiyi yerlərdəndir.
Azərbaycan vətəndaşları Albaniyada 90 günədək vizasız qala bilirlər.
Mərakeş – Marrakeşdən Kasablankaya
Şimali Afrikanın fərqli atmosferini yaşamaq istəyənlər üçün Mərakeş maraqlı istiqamətdir.
Marrakeşdə Mədinə, Camaa əl-Fəna meydanı və rəngarəng bazarlar, Kasablankada isə II Həsən məscidi ziyarət edilə bilər. Atlas dağları və səhra turları da ölkənin əsas turistik təcrübələri sırasındadır.
Azərbaycanın adi pasportuna malik vətəndaşları Mərakeşdə 90 günədək vizasız qala bilirlər.
Maldivlər – təkcə bal ayı üçün deyil
Maldivlər deyəndə ilk ağla gələn ağ qumlu çimərliklər və mavi dənizdir. Amma ölkədə adalararası qayıq səfərləri, sualtı aləmin müşahidəsi və yerli adaların gəzintisi də mümkündür.
Azərbaycan və Maldiv Respublikası arasında adi pasport sahibləri üçün vizasız rejim 29 aprel 2026-cı ildə qüvvəyə minib. Azərbaycan vətəndaşları Maldivlərdə 90 günədək vizasız qala bilərlər.
İran – Təbrizdən İsfahana
Yaxın məsafədə fərqli mədəniyyət görmək istəyənlər üçün İran da vizasız istiqamətlərdəndir.
Təbrizdə El Gölü və Təbriz bazarı, İsfahanda isə Nəqşi-Cahan meydanı, Si-o-se-pol körpüsü və tarixi məscidlər diqqət çəkir.
Azərbaycan vətəndaşları İranda 15 günədək vizasız qala bilirlər.
Monteneqro – Adriatik sahilləri
Monteneqro xüsusilə dəniz və təbiət mənzərələrini sevənlər üçün maraqlı istiqamətdir.
Kotorun tarixi küçələri, Kotor körfəzi, Budva sahilləri və Durmitor Milli Parkı ölkənin ən çox diqqət çəkən məkanlarındandır.
Azərbaycan vətəndaşları Monteneqroda 90 günədək vizasız qala bilirlər.
Bosniya və Herseqovina – Sarayevo və Mostar
Sarayevo şəhərinin tarixi mərkəzi, Mostardakı məşhur Mostar körpüsü və ölkənin dağlıq təbiəti Bosniya və Herseqovinanı fərqli Avropa istiqamətinə çevirir.
Azərbaycan vətəndaşları 90 günədək vizasız qala bilirlər.
Malayziya – Kuala Lumpur və Langkavi
Asiya səyahəti planlaşdıranlar üçün Malayziyada həm böyük şəhər, həm də tropik ada təcrübəsi yaşamaq mümkündür.
Kuala Lumpurda Petronas qüllələri və Batu mağaraları, Langkavidə isə çimərliklər və tropik təbiət əsas turistik məkanlardandır.
Azərbaycan vətəndaşları Malayziyada 30 günədək vizasız qala bilirlər.
Səfər planlaşdırarkən yalnız viza məsələsinə baxmaq kifayət deyil. Pasportun etibarlılıq müddəti, ölkədə qalma limiti, geri dönüş bileti, sığorta və digər giriş şərtləri də nəzərə alınmalıdır.
Bundan başqa, vizasız qalma müddəti bitdikdən sonra ölkədə qalmaq üçün əlavə icazə və ya viza tələb oluna bilər.
Ona görə də bilet almadan əvvəl səfər ediləcək ölkənin aktual giriş qaydalarını yoxlamaq vacibdir.
Leave a Reply